Komunistang hitman, todas sa shootout

@Balitang Probinsiya | January 28, 2021

ISABELA—Isang hitman ng komunistang New People’s Army (NPA) ang napatay nang manlaban at makipagbarilan sa pulisya kamakalawa sa Bgy. Palacian, San Agustin.

Ang suspek ay kinilala ng pulisya na si Renato Busania, miyembro ng NPA na nakabase sa naturang lalawigan.

Ayon sa ulat, darakpin sana ng pulisya si Busania kaugnay sa kaso nitong double murder, pero biglang pinagbabaril ng suspek ang mga awtoridad.

Mabilis na nakaganti ng putok ang mga operatiba dahilan kaya napatay ang suspek na tinamaan ng mga bala sa katawan.

Napag-alamang nakarekober ang pulisya ng kalibre .45 pistola at mga bala sa pinangyarihan ng insidente.