Kelot, tinaga ng lasing

@Balitang Probinsiya | October 15, 2023

QUEZON -- Isang 18-anyos na binata ang sugatan nang tagain ng isang lasing kamakalawa sa Bgy. Magallanes, Lopez sa lalawigang ito.

Kinilala ng pulisya ang biktima na nagtamo ng isang tama ng taga sa kanang kamay na si Mark Ray Roda, residente ng Bgy. Vergana sa naturang bayan, samantalang hindi muna pinangalanan ang suspek hangga’t hindi ito nadadakip ng mga awtoridad.

Ayon sa ulat, habang minamaneho ni Roda ang kanyang motorsiklo ay biglang sumulpot ang lasing na suspek at tinaga sa kanang kamay ang biktima.

Napag-alaman na matapos ang pananaga ay tumakas ang suspek, samantalang dinala naman ng mga saksi ang biktima sa ospital at kasalukuyang inoobserbahan pa ito.

Iniimbestigahan na ng mga awtoridad ang motibo ng suspek sa pananaga sa biktima.