Kelot, tiklo sa tupada

@Balitang Probinsiya | June 5, 2023

ALBAY—Isang sabungero ang inaresto ng mga tauhan ng pulisya kamakalawa sa isang tupadahan sa Bgy. Balading, Malinao sa lalawigang ito.

Itinago na muna ang suspek sa pangalang "Domingo" habang iniimbestigahan ito sa himpilan ng pulisya.

Ayon sa ulat, may nagbigay ng impormasyon sa mga awtoridad na may mga nagsasagawa ng ilegal na sabong sa naturang lugar kaya agad itong sinalakay ng mga operatiba at dito nadakip ang suspek, samantalang mabilis na nakatakas ang iba pang sabungero.

Nakakumpiska ang mga operatiba ng mga manok na panabong, cash at mga tari sa lugar na pinagdausan ng sabong.

Inihahanda na ng pulisya ang kasong illegal gambling laban kay "Domingo", samantalang pinaghahanap pa ng pulisya ang ibang nakatakas na sabungero.