Kelot sinaksak ng amok

@Balitang Probinsiya | October 20, 2022

AKLAN—Isang lalaki ang sugatan nang saksakin ng lasing na nag-aamok kamakalawa sa Bgy. Poblacion, Kalibo.

Sa ngayon ay inaalam pa ng mga awtoridad ang pagkakakilanlan ng biktima na nagtamo ng saksak sa katawan.

Ayon sa ulat, naglalakad umano ang biktima ng makita nito ang lasing na suspek na si Jomar Calixto, nasa hustong gulang, na nagwawala habang may hawak na patalim sa nasabing barangay.

Sinabi ng mga saksi na imbes na matakot ay pinanood pa ng biktima ang pagwawala ni Calixto at dahil dito ay nilapitan at sinaksak siya ng suspek.

Dinala ng mga saksi ang biktima sa ospital at ginagamot na ito sa pagamutan, samantalang agad namang nadakip ng mga rumespondeng pulisya ang suspek.