Kelot, niratrat sa waiting shed

@Balitang Probinsiya | October 26, 2020

NORTH COTABATO—Isang lalaki ang pinagbabaril hanggang sa mapatay ng mga hindi kilalang armadong salarin kamakalawa sa waiting shed ng national highway ng bayan ng Makilala.

Kinilala ang biktimang nagtamo ng mga tama ng bala sa katawan na si Butsoy Nioda, residente ng Bgy. Saguing sa nabanggit na bayan.

Ayon sa ulat ng pulisya, habang nakatayo umano si Nioda sa waiting shed at naghihintay ng masasakyang pampasaherong jeep sa nasabing lugar nang sumulpot ang mga suspek at agad pinagbabaril ang biktima.

Matapos tiyaking patay na si Nioda ay mabilis na tumakas ang mga suspek.

Nagpalabas na ng manhunt operation ang pulisya para madakip ang mga salarin.