Kelot kritikal sa motorsiklo at van

@Balitang Probinsiya | March 22, 2023

AKLAN—Isang 25-anyos na binata ang nasa kritikal na kondisyon nang aksidenteng mabangga ng isang motorsiklo at isang van kamakalawa sa Bgy. Bulwang, Numancia sa lalawigang ito.

Ang biktima ay kinilala ng pulisya na si Sheldon Apolinario, residente ng nasabing barangay.

Ayon sa ulat, habang naglalakad sa gilid ng kalsada si Apolinario ay aksidente itong nabangga ng isang motorsiklo, at nang tumilapon sa gitna ng lansangan ay aksidente rin itong nabangga ng isang van.

Agad dinala ng mga saksi ang biktima sa pagamutan at sa kasalukuyan ay inoobserbahan pa ito.

Kusang sumuko naman sa pulisya ang rider ng motorsiklo na si Rogien Reyes, samantalang pinaghahanap pa ang tumakas na driver ng van.