Kelot, arestado sa pekeng pera

@Balitang Probinsiya | Oct 23, 2021

CEBU CITY—Nadakip ng pulisya ang isang lalaki nang makumpiskahan ng pekeng pera kamakalawa sa Bgy. San Nicolas.

Ang suspek ay nakilalang si Joseph Salas, nasa hustong gulang at nakatira sa nabanggit na lungsod.

Ayon sa ulat, may tinanggap na impormasyon ang mga awtoridad na nagbebenta ng pekeng P1-K bill ang suspek sa halagang P500.

Dahil dito, agad nagsagawa ng buy-bust operation ang mga operatiba at nang pagbentahan sila ni Salas ng pekeng pera ay agad dinakip ng mga awtoridad ang suspek.

Hindi naman nanlaban ang suspek nang dakpin siya ng mga awtoridad.