Kelot arestado sa patalim

@Balitang Probinsiya | March 14, 2023

PALAWAN—Isang 19-anyos na binata ang inaresto ng mga tauhan ng pulisya nang makumpiskahan ng isang patalim kamakalawa sa Bgy. Irawan, Puerto Princesa City sa lalawigang ito.

Ang suspek ay kinilala ng pulisya na si Marvin Dayundon, residente sa nabanggit na barangay.

Nabatid na may nag-report sa himpilan ng pulisya tungkol sa suspek na may dalang patalim habang gumagala sa nasabing barangay.

Dahil dito, agad rumesponde ang mga awtoridad kaya nadakip ang suspek at nakumpiska dito ang isang kutsilyo.

Kusang sumama naman sa pulisya ang suspek na nahaharap ngayon sa kasong illegal possession of deadly weapon.