Kawani ng LGU niratrat

@Balitang Probinsiya | March 12, 2023

MAGUINDANAO DEL NORTE—Isang kawani ng local government unit (LGU) ang namatay nang barilin ng mga hindi kilalang armadong lalaki kamakalawa sa SPDA compound, Datu Odin Sinsuat sa lalawigang ito.

Kinilala ng pulisya ang biktimang nagtamo ng mga tama ng bala sa katawan na si Faizal Malaguiok, empleyado ng Cotabato City Hall.

Ayon sa ulat, nakatayo umano si Malaguiok sa nasabing lugar nang biglang sumulpot ang mga suspek at agad pinagbabaril ang biktima.

Nang matiyak na patay na ang biktima ay mabilis na tumakas ang mga salarin.

Iniimbestigahan pa ng pulisya ang motibo ng mga suspek sa pamamaslang sa biktima.