Karatula ng checkpoint binangga, driver tiklo

@Balitang Probinsiya | January 26, 2021

PANGASINAN—Isang driver ang dinakip ng mga awtoridad nang banggain ng minamaneho nitong tricycle ang karatula sa police checkpoint kamakalawa sa Bgy. Bulingit, San Carlos City.

Pansamantalang hindi pinangalanan ang suspek habang inaalam pa ng mga awtoridad kung may criminal record ito sa pulisya.

Ayon sa ulat, habang nagmamando ng checkpoint ang mga awtoridad ay napadaan dito ang tricycle na minamaneho ng suspek.

Napag-alamang imbes na huminto ay binangga ng minamanehong tricycle ng suspek ang karatula sa police checkpoint at dahil dito ay tinugis siya ng mga awtoridad at dinakip.

Nakatakdang sampahan ng pulisya ng patung-patong na kaso ang suspek.