Kagawad, arestado sa boga

@Balitang Probinsiya | July 6, 2023

CAPIZ -- Isang barangay kagawad ang dinakip ng mga tauhan ng pulisya nang makumpiskahan ng isang baril at mga bala kamakalawa sa loob ng kanyang bahay sa Bgy. Dapdapan, Sapian sa lalawigang ito.

Kinilala ng pulisya ang suspek na si Kagawad Virgilio Peralta, nasa hustong gulang at residente sa nabanggit na barangay.

Nabatid na sinalakay ng pulisya sa bisa ng search warrant ang bahay ni Peralta at dito nakumpiska ang isang baril na kalibre .45 pistola at mga bala.

Hindi naman nanlaban ang suspek nang arestuhin ng mga operatiba.

Nakapiit na ang suspek na nahaharap sa kasong illegal possession of firearms and ammunitions.