Jeepney driver, nilikida ng rider

@Balitang Probinsiya | June 12, 2023

BATANGAS -- Isang jeepney driver ang namatay nang barilin ng isang rider kamakalawa sa Bgy. Sta. Anastasia, Sto. Tomas sa lalawigang ito.

Ang biktimang nagtamo ng mga tama ng bala sa katawan ay nakilalang si Ruel Catimbang, 40, at nakatira sa Bgy. Bagbag, Tanauan City sa nasabing lalawigan.

Ayon sa ulat, habang minamaneho ni Catimbang ang pinapasada niyang jeep ay biglang sumulpot ang hindi kilalang salarin na nakasakay sa isang motorsiklo at agad pinagbabaril ang biktima.

Mabilis na tumakas ang suspek nang matiyak na patay na ang biktima.

Iniimbestigahan pa ng pulisya ang motibo ng suspek sa pamamaslang kay Catimbang.