Jeep vs. pick-up, 1 patay, 6 sugatan

@Balitang Probinsiya | February 11, 2021

MAGUINDANAO—Isang driver ang namatay at anim katao pa ang sugatan nang aksidenteng magkabanggaan ang pampasaherong jeep at pick-up kamakalawa sa Bgy. Ladia, Sultan Kudarat.

Ang nasawi ay si Mohammad Kadil, driver ng pampasaherong jeep, samantalang sugatan ang mga pasahero nitong sina Diokno Kadilag, Eyyad Buisan, Geraldo Segindera, driver ng pick-up na si Benjamin Malang at mga kasama nito sa sasakyan na sina Nelson Adil at Norhaina Datumaong, pawang nakatira sa naturang lalawigan.

Ayon sa ulat, kapwa mabilis umano ang takbo ng jeep na minamaneho ni Kadil at pick-up na minamaneho naman ni Malang kaya aksidenteng nagkabanggaan ang dalawang sasakyan.

Napag-alamang nagtamo ng mga sugat sa ulo at katawan ang mga biktima.

Dinala ng mga saksi ang mga biktima sa ospital, pero idineklarang dead-on-arrival si Kadil.