Isnatser ng cellphone, nasakote

@Balitang Probinsiya | June 13, 2023

AKLAN -- Isang isnatser ng cellphone ang nadakip ng mga tauhan ng pulisya kamakalawa sa Bgy. Poblacion, Numancia sa lalawigang ito.

Kinilala ang suspek na si Uziel Solanoy, nasa hustong gulang at nakatira sa naturang bayan.

Ayon sa ulat, habang nanonood ng basketball sa kanilang barangay ang biktimang si Fiona Albino, 19, ay biglang inagaw ni Solanoy ang hawak na cellphone ng dalaga.

Dahil dito, agad humingi ng saklolo sa pulisya ang biktima at sa mabilis na pagresponde ng mga awtoridad ay nadakip ang suspek.

Inihahanda na ng mga awtoridad ang kasong qualified theft laban sa suspek.