2 impeachment kay PBBM, ibinasura

by Mylene Alfonso @News | February 4, 2026

File Photo: Bongbong Marcos / FB

Ibinasura ng House Committee on Justice ang dalawang impeachment complaint na inihain laban kay Pangulong Ferdinand Marcos, Jr. dahil sa “insufficient in substance” o kakulangan ng basehan para ipagpatuloy ang pagtalakay sa usapin.

Sa botohan sa unang impeachment complaint na inihain ng abogadong si Andre de Jesus, 42 kongresista ang bumoto na ibasura ito, isa ang tumutol, at isa ang hindi bumoto.

Habang sa ikalawang reklamo na inihain ng Makabayan coalition, pinagbotohan ito na ideklarang sapat sa sustansiya pero 39 na kongresista ang tumutol, at pito lang ang pumabor.

Nakasaad sa unang impeachment complaint na inihain laban kay Marcos ang pagtataksil sa tiwala ng publiko at paglabag sa Konstitusyon at iba pa, dahil sa umano’y pag-utos at pagpapahintulot sa pagdukot at pagsuko kay dating Pangulong Rodrigo Duterte sa International Criminal Court (ICC); kasama rin ang paratang na gumagamit ang Pangulo ng ilegal na droga na nakaaapekto sa kanyang pamumuno sa bansa; at sa kabiguang i-veto ang mga unprogrammed appropriations at iba pang probisyon na labag sa Konstitusyon sa pambansang budget para sa 2023, 2024, 2025, at 2026, at iba pa.

Sa ikalawang reklamong inihain ng Makabayan bloc, nakasaad naman na nagkasala ang Pangulo ng pagtataksil sa tiwala ng publiko dahil sa pagpapatupad ng Baselined-Balanced-Managed (BBM) Parametric Formula sa paglalaan ng mga proyektong pang-imprastraktura na umano’y nagresulta sa mga “ghost’, substandard, at overpriced na flood management projects, at iba pa.

Bago ang botohan, sinabi ni House justice panel chairperson at Batangas Rep. Gerville Luistro na ang pagtukoy sa sufficiency in substance ng reklamong impeachment ay hindi nakabatay sa teorya ng mahigpit na pananagutan sa pamamahala.

“The official is not constitutionally impeachable simply because wrongdoing is alleged somewhere in the bureaucracy or because a policy decision is later criticized or questioned. To hold otherwise would collapse the careful constitutional design and render every official perpetually vulnerable to impeachment based on suspicion alone,” paliwanag ni Luistro.

“At the same time, the committee recognizes that impeachment exists precisely to address serious abuses of power where a complaint alleges with clarity, specificity, and factual grounding that the official committed a grave breach of public trust. Our proceeding today is intended to test the legal sufficiency of the complaint, not their popularity, not their rhetoric, not their political appeal,” diin niya.

Matatandaang inaprubahan ng komite na ‘sufficient in form’ ang dalawang reklamo.