Illegal recruiter, timbog

@Balitang Probinsiya | April 22, 2023

CAPIZ—Isang illegal recruiter ang inaresto ng mga tauhan ng pulisya, kamakalawa sa Bgy. Baybay, Roxas City sa lalawigang ito.

Kinilala ng pulisya ang suspek na si Carrel Escobido, nasa hustong gulang at nakatira sa nabanggit na barangay.

Napag-alaman na dinakip ng pulisya si Escobido dahil sa reklamo ng mga naging biktima ng illegal recruitment ng suspek.

Ayon sa mga hindi pinangalanang biktima, matapos nilang magbigay ng pera kay Escobido para makapagtrabaho sa ibang bansa ay hindi na ito nagpakita sa kanila.

Napag-alaman na naaresto si Escobido sa isinagawang entrapment operation ng pulisya matapos hingan ulit ng pera ng suspek ang dalawa sa kanyang biktima.