'Hot logs' narekober

@Balitang Probinsiya | Enero 28, 2023

ROMBLON — Narekober ng mga awtoridad kamakalawa ang inabandonang mga "hot logs" o mga punong-kahoy na illegal na pinutol sa kabundukan ng bayan ng San Fernando sa lalawigang ito.

Ang nasabing mga "hot logs" ay narekober ng mga awtoridad sa baybaying-dagat ng Bgy. Campalingo sa naturang bayan.

Ayon sa ulat, may tinanggap na impormasyon ang mga awtoridad na may mga kalalakihan na nagdala ng mga pinutol na punong-kahoy sa baybaying-dagat sa naturang lugar kaya agad rumesponde ang mga operatiba, pero nakatakas ang mga suspek.

May hinala ang mga awtoridad na ang mga pinutol na punong-kahoy ay isasakay sa bangka para mailabas sa nasabing bayan.

Pinaghahanap na ngayon ng mga awtoridad ang mga suspek upang sampahan ng kasong paglabag sa Presidential Decree 705 o Revised Forestry Code of the Philippines.