Grade 12 student hinoldap na, sinaksak pa

@Balitang Probinsiya | November 5, 2023

NEGROS OCCIDENTAL -- Isang binatilyong Grade 12 student ang sugatan nang saksakin ng isang hindi kilalang holdaper kamakalawa sa Brgy. To-oy, Himamaylan City sa lalawigang ito.

Ang biktima na nagtamo ng malaking sugat sa ulo at saksak sa katawan ay itinago ng pulisya sa alyas na "Totoy," 17, at nakatira sa nabanggit na barangay.

Ayon sa ulat, habang nakaupo si "Totoy" sa bangketa sa nasabing lugar at naglalaro ng video games gamit ang kanyang cellphone ay bigla itong pinalo ng suspek ng bote sa ulo at pagkaraan ay sinaksak ito sa tiyan at saka kinuha at tinangay ang cellphone ng biktima.

Matapos ang pananaksak kay "Totoy" ay mabilis na tumakas ang suspek, samantalang dinala naman ng mga residente ang biktima sa ospital.

Nagpalabas na ngayon ng manhunt operation ang pulisya para madakip ang suspek.