Gov’t. employee, todas sa riding-in-tandem

@Balitang Probinsiya | Enero 26, 2024

COTABATO CITY -- Isang government employee ang namatay nang pagbabarilin ng riding-in-tandem kamakalawa sa Gov. Gutierrez Avenue sa lungsod na ito.

Ang biktimang nagtamo ng mga tama ng bala sa katawan ay nakilalang si Sulaiman Macabangon, nasa hustong gulang, kawani ng Bangsamoro Transition Authority (BTA) at residente ng Maguindanao del Norte.

Ayon sa ulat, habang nakaupo si Macabangon sa nakaparada niyang kotse sa nasabing lugar ay biglang sumulpot ang mga suspek na lulan ng isang motorsiklo at agad pinagbabaril ang biktima.

Matapos tiyaking patay na ang biktima ay saka mabilis na tumakas ang mga salarin. 

Patuloy ang imbestigasyon ng pulisya para mabatid ang motibo ng mga suspek sa pamamaslang sa biktima.