Ginang, pinatay ng kawatang bagets

@Balitang Probinsiya | August 9, 2023

NEGROS OCCIDENTAL -- Isang 43-anyos na ginang ang namatay nang pagsaksakin ng isang binatilyong magnanakaw kamakalawa sa Bgy. Quezon, San Carlos City sa lalawigang ito.

Kinilala ng pulisya ang biktimang nagtamo ng mga tama ng saksak sa katawan na si Amostiola Cabugnason, samantalang hindi na pinangalanan ang binatilyong suspek na edad 16 na residente rin sa nasabing barangay.

Ayon sa ulat, nilooban ng binatilyo ang bahay ni Cabugnason at nang makita ng biktima ang suspek ay sinita niya ito, at dahil dito ay pinagsasaksak ng salarin ang ginang.

Matapos ang pananaksak, saka mabilis na tumakas ang suspek, pero nadakip siya ng mga rumespondeng tauhan ng pulisya.

Dinala pa ng kanyang mga kapitbahay ang biktima sa pagamutan, pero idineklara itong dead-on-arrival.