Ex-convict, kulong sa droga

@Balitang Probinsiya | ngayong Marso 17, 2024

NEGROS OCCIDENTAL -- Isang ex-convict na drug pusher na nagbenta uli ng droga ang naaresto sa buy-bust operation ng mga otoridad kamakalawa sa Brgy. 20, Bacolod City sa lalawigang ito.

Kinilala ng pulisya ang suspek na si Romy Maciling, 56, at residente ng Brgy. Taculing sa nabanggit na lungsod. 

Nabatid na may tinanggap na impormasyon ang mga otoridad na nagbebenta uli ng umano’y shabu ang suspek kaya nagsagawa agad ng buy-bust operation ang mga operatiba na naging dahilan at naaresto ito.

Ayon sa ulat, nakakumpiska ang pulisya ng mahigit 30 gramo ng hinihinalang shabu at markadong pera sa pag-iingat ng suspek na dati na ring nakulong sa kasong illegal drugs.

Hindi naman nanlaban ang suspek nang dakpin siya ng mga otoridad at ngayon ay nakapiit na siya sa detention cell ng himpilan ng pulisya.