Empleyado kritikal nang pumalag sa 3 holdaper

@Balitang Probinsiya | November 12, 2022

PALAWAN—Kritikal ang kalagayan ng isang empleyado nang manlaban sa tatlong lalaking nangholdap sa kanya kamakalawa sa Bgy. Bacungan, Puerto Princesa City.

Ang biktima na nagtamo ng isang tama ng bala sa katawan, pasa at bukol sa ulo ay nakilalang si Allan Lagrosa, nasa hustong gulang at nakatira sa nabanggit na lungsod.

Ayon sa ulat, habang lulan si Lagrosa ng kanyang motorsiklo ay biglang sumulpot ang tatlong suspek at ang isa sa mga ito ay binaril ang biktima.

Bagama't sugatan ay nagawa pang manlaban ni Lagrosa dahilan para bugbugin pa siya at paluin ng kahoy sa ulo ng mga suspek hanggang makuha ng mga holdaper ang dala niyang bag na naglalaman ng cash.

Inoobserbahan pa sa pagamutan si Lagrosa, samantalang sinampahan na ng pulisya ng kasong robbery with frustrated homicide ang mga suspek.