Drug dealer timbog sa drug-bust

@Balitang Probinsiya | March 11, 2023

SULU—Isa sa dalawang drug dealer ang nadakip sa isinagawang drug-bust operation ng mga awtoridad kamakalawa sa Bgy. Pang, Kalingalan Caluang sa lalawigang ito.

Ang nadakip na suspek ay nakilalang si Morasad Jaiyari, samantalang pinaghahanap pa ang kasamahan nito na nakatakas na si alyas "Albasir", kapwa nakatira sa nasabing lalawigan.

Ayon sa ulat, nagsagawa ng drug-bust operation ang mga operatiba sa nasabing lugar, pero si Jaiyari lang ang nadakip at mabilis na nakatakas si "Albasir".

Napag-alaman na nakakumpiska ang mga awtoridad ng mahigit limang gramo ng shabu at markadong pera sa pag-iingat ni Jaiyari.

Nahaharap ngayon si Jaiyari sa kasong paglabag sa Comprehensive Dangerous Drugs Act of 2002.