Driver timbog sa tangkang pagkatay ng 5 aso

@Balitang Probinsiya | September 28, 2022

NUEVA ECIJA—Isang driver ang dinakip ng pulisya nang makumpiskahan ng limang payat na aso na nakalagay sa isang sako kamakalawa sa Bgy. Conception, Gen. Tinio.

Kinilala ng pulisya ang suspek na si Ruel Bote, nasa hustong gulang at nakatira sa naturang barangay.

Ayon sa ulat, pinara ng mga awtoridad ang minamanehong tricycle ni Bote at nang tingnan ang laman ng isang sako ay dito nakita ng pulisya ang limang payat na aso.

Nabatid na may duda ang mga awtoridad na ibebenta ng suspek ang mga aso para katayin at ibenta ang karne nito, na ayon sa pulisya ay ipinagbabawal ng batas.

Nakapiit na ang suspek na nahaharap sa kasong paglabag sa Animal Welfare Act of 2017.