Driver, dinedbol ng pasahero

@Balitang Probinsiya | November 21, 2020

ILOCOS SUR—Isang tricycle driver ang namatay nang barilin ng isa sa dalawa niyang pasahero kamakalawa sa Bgy. San Julian Sur, Vigan City.

Ang biktima ay nakilalang si Jason Ugay, nakatira sa nabanggit na lungsod.

Ayon sa ulat, sumakay sa pinapasadang tricycle ni Ugay ang dalawang hindi kilalang lalaki, na ang isa ay sa loob ng sidecar umupo at ang isa ay umangkas sa likod ng sasakyan.

Sinabi ng mga saksi na pumara umano ang mga suspek at pagkahinto ay agad binaril ng isa sa mga salarin na nakaangkas sa likod ng tricycle ang ulo ng biktima.

Nang matiyak na patay na ang biktima ay mabilis tumakas ang mga suspek, samantalang nagpalabas na ng manhunt operations ang pulisya para madakip ang mga salarin.