Dalagita, nalunod sa dagat

@Balitang Probinsiya | Enero 17, 2023

PALAWAN—Patay ang17-anyos na dalagita nang malunod habang naliligo sa dagat na sakop ng Bgy. Simpocan, Puerto Princesa City.

Ang biktima ay nakilalang si Ella Aludia, residente ng Bgy. San Manuel sa nabanggit na lungsod.

Nabatid na naligo si Aludia, kasama ang kanyang mga kamag-anak at kaibigan sa dagat sa naturang lugar at nang magawi sa malalim na bahagi ng tubig ay dito nalunod ang biktima.

Napag-alamang agad sumaklolo ang mga residente, pero hindi agad nakita ang biktima na lumubog sa dagat.

Ayon sa ulat, nang dumating ang rescue team ay saka lang natagpuan sa ilalim ng dagat ang biktima at agad itong dinala sa pagamutan, pero idineklara itong dead-on-arrival.