Construction worker, tinodas ng kaalitan

@Balitang Probinsiya | July 16, 2023

QUEZON -- Isang construction worker ang namatay nang pagsasaksakin ng kanyang kaalitan kamakalawa sa Bgy. Concepcion 1, Sariaya sa lalawigang ito.

Kinilala ng pulisya ang biktimang nagtamo ng mga tama ng saksak sa katawan na si Junior Reynante, samantalang ang suspek ay si Niel Yacon, kapwa nasa hustong gulang, at parehong nakatira sa nasabing bayan.

Ayon sa ulat, habang nag-uusap ay nagkaroon ng pagtatalo sina Reynante at Yacon na humantong sa suntukan hanggang pagsasaksakin ng suspek ang biktima.

Agad dinala ng mga saksi ang biktima sa ospital, pero idineklara itong dead-on-arrival.

Nahaharap ang suspek sa kasong murder.