Construction worker, dinedo ng pasahero

@Balitang Probinsiya | ngayong Marso 23, 2024

NEGROS OCCIDENTAL -- Isang construction worker ang napatay nang barilin ng isang lalaking kapwa niya pasahero sa isang tricycle, kamakalawa sa Brgy. Carabalan, Himamaylan City sa lalawigang ito. 

Ang biktimang nagtamo ng isang tama ng bala sa dibdib ay nakilalang si William Balsimo, 38 at nakatira sa nasabing lungsod, samantalang hindi na muna pinangalanan ang suspek hangga’t hindi pa ito nadadakip ng mga otoridad.

Ayon sa ulat, sumakay si Balsimo sa isang tricycle na kinalululanan din ng tatlong lalaki at sa hindi malamang dahilan ay binaril ng suspek ang biktima.

Matapos ang pamamaril ay tumakas ang suspek, samantalang dinala ng tricycle driver at ng dalawa pang pasahero si Balsimo sa ospital, pero idineklara itong dead-on-arrival.

Patuloy pa ang imbestigasyon ng pulisya sa insidente para mabatid ang motibo ng suspek sa pamamaslang sa biktima.