Construction worker, dedbol sa landslide

@Balitang Probinsiya | Pebrero 10, 2023

BATANGAS – Isang construction worker ang namatay at isa pa ang nasa kritikal na kondisyon nang matabunan sila ng landslide kamakalawa sa Bgy. Babuyan, Mataas na Kahoy sa lalawigang ito.

Kinilala ang nasawi na si Elmerto Teosan, samantalang ang sugatan ay si Mario Valencia, kapwa nasa hustong gulang at parehong residente sa naturang lalawigan.

Ayon sa ulat, bigla umanong gumuho ang lupa sa drainage na hinuhukay ng dalawang biktima kaya natabunan sila ng lupa.

Agad sumaklolo ang mga residente at dinala sa ospital ang dalawang biktima, pero idineklarang dead-on-arrival si Teosan.

Patuloy pa ang isinasagawang imbestigasyon ng mga awtoridad sa naganap na insidente.