Chairman na nambugbog, inireklamo

@Balitang Probinsiya | January 06, 2022

AKLAN—Inireklamo sa pulisya ang isang barangay chairman na nambugbog umano ng lasing kamakalawa sa bayan ng Libacao.

Hindi muna pinangalanan ang barangay chairman habang nag-iimbestiga pa.

Ayon sa ulat, binugbog umano ng barangay chairman ang biktimang si Vincent Sison, nasa hustong gulang dahil nagwawala umano ito dahil sa labis na kalasingan.

Pinabulaanan naman ng biktima na siya ay nagwawala, bagama’t inaming lasing siya pero pauwi na umano siya nang sitahin ng barangay chairman hanggang sa bugbugin siya.

Itinanggi ng barangay chairman na binugbog niya ang biktima, at kaya lang umano ito nagkaroon ng mga pasa ay dahil nagpupumiglas umano ito nang hulihin ng mga barangay tanod dahil sa pagwawala sa kanilang barangay.