Binatang rider, sugatan sa tricycle

@Balitang Probinsiya | Oct 20, 2021

CAPIZ--Sugatan ang isang binatang rider nang aksidenteng mabangga ng tricycle ang minamaneho niyang motorsiklo kamakalawa sa Bgy. Lawaan, Roxas City.

Kinilala ng pulisya ang biktima na si Richard Lopez, nasa hustong gulang, samantalang ang driver naman ng tricycle ay si Mario Jinio, 45-anyos, kapwa nakatira sa nabanggit na lalawigan.

Ayon sa ulat, mabilis umano ang takbo ng tricycle na minamaneho ni Jinio kaya nabangga ang motorsiklong kinalululanan ng biktima.

Kaagad dinala ng mga saksi ang biktima sa pagamutan at sa kasalukuyan ay ginagamot na ito sa ospital.

Nakapiit na si Jinio sa detention cell ng himpilan ng pulisya at sa ngayon ay nahaharap siya sa kasong reckless imprudence resulting to physical injury and damage to property.