Batang lalaki, nasagasaan ng trak

@Balitang Probinsiya | December 05, 2021

SARANGANI--Isang batang lalaki ang namatay nang aksidenteng masagasaan ng trak na umaatras kamakalawa sa Bgy. Paraiso, Alabel.

Dahil menor-de-edad ay hindi na pinangalanan ng pulisya ang biktima na isang taong gulang pa lamang at residente sa nasabing barangay.

Ayon sa ulat, habang iniaatras ni Renante Unday, 25-anyos ang minamaneho niyang trak ay aksidenteng nasagasaan niya ang bata.

Nagsasagawa na ng imbestigasyon ang pulisya kung bakit napunta sa likurang bahagi ng trak ang biktima gayung hindi pa naman ito naglalakad dahil 1 taong gulang pa lamang ang bata.

Nakapiit na si Unday na nahaharap sa kasong reckless imprudence resulting to homicide.