Batang babae, tepok sa sunog

@Balitang Probinsiya | November 10, 2023

LAGUNA -- Isang 7-taong gulang na batang babae ang nasawi sa naganap na sunog kamakalawa sa Brgy. Caingin, Sta. Rosa City sa lalawigang ito.

Dahil menor-de-edad ang biktima, hindi na ito pinangalanan ng mga awtoridad.

Ayon sa ulat, biglang sumiklab ang sunog sa squatter area sa nasabing barangay at dahil gawa lang sa light materials ang mga kabahayan ay mabilis na kumalat ang apoy na nadamay sa nasunog na tahanan ng pamilya ng bata na siyang ikinamatay nito.

Sa imbestigasyon ng mga awtoridad ay nasa 100 bahay ang natupok sa nasabing lugar.

Makalipas ang ilang oras ay naapula rin ang apoy at sa ngayon ay iniimbestigahan na ng mga awtoridad ang sanhi ng sunog nabanggit na lugar.