Basurero, binugbog ng 4 kelot

@Balitang Probinsiya | November 16, 2020

CAMARINES SUR—Isang basurero ang binugbog ng apat na hindi kilalang lalaki kamakalawa sa Bgy. Dayangdang, Naga City.

Kinilala ng pulisya ang biktima na si Mark Cadano, 38-anyos at nakatira sa Bgy. Cararayan sa naturang barangay.

Batay sa imbestigasyon, habang namumulot umano ng basura si Cadano ay biglang sumulpot ang puting sasakyan at isinakay dito ang biktima saka pinagtulungang bugbugin.

Ayon sa biktima, matapos siyang bugbugin ay ibinaba siya ng mga suspek sa Bgy. Concepcion Pequena sa nasabing lungsod.

Sinabi ni Cadano na wala siyang alam na kagalit para bugbugin siya ng mga suspek, samantalang patuloy ang imbestigasyon ng pulisya para makilala at madakip ang apat na lalaking nanggulpi sa biktima.