Bagets nalunod sa ilog

@Balitang Probinsiya | Pebrero 25, 2023

MASBATE—Isang 15-anyos na binatilyo ang namatay nang malunod habang naliligo sa ilog na sakop ng Bgy. Quezon, Uson sa lalawigang ito.

Sa kahilingan ng pamilya ng biktima, ay itinago sa pangalang "Totoy" ang nalunod na binatilyo.

Nabatid na naligo si "Totoy" kasama ang kanyang mga kamag-anak at kaibigan sa ilog sa naturang lugar, at nang magawi sa malalim na bahagi ng tubig ay dito nalunod ang biktima.

Napag-alaman na agad sumaklolo ang mga residente, pero hindi agad nakita ang biktima na lumubog sa ilog.

Ayon sa ulat, makalipas ang ilang oras na paghahanap ay saka lang natagpuan sa ilalim ng ilog ang biktima at agad itong dinala sa pagamutan, pero idineklara itong dead-on-arrival.