Babaeng negosyante binoga

@Balitang Probinsiya | October 28, 2022

CAVITE—Isang negosyanteng babae ang sugatan nang barilin ng isa sa tatlong lalaking nakaalitan nito kamakalawa sa Bgy. Labac, Naic.

Ang biktimang nagtamo ng tama ng bala sa katawan ay kinilalang si Cristina Tibo, 45-anyos, at nakatira sa nabanggit na barangay.

Ayon sa ulat, nagkaroon ng mainitang pagtatalo si Cristina at ang tatlong suspek na sina John Palado, Elwood Pomanes at Jobert Paco, pawang nasa hustong gulang sa nasabing lugar.

Nabatid na habang nagtatalo ay biglang naglabas ng baril si Palado at binaril sa katawan ang biktima.

Kaagad namang nadakip ng pulisya ang tatlong suspek, samantalang dinala ng mga saksi si Cristina sa ospital at kasalukuyan pa itong inoobserbahan sa pagamutan.