Babaeng mangingisda namatay sa lunod

@Balitang Probinsiya | November 2, 2022

ALBAY—Isang babaeng mangingisda ang namatay nang malunod kamakalawa sa dagat na sakop ng Bgy. Tinapian, Manito.

Ang biktima ay nakilalang si Gloria Butre, 59-anyos, residente ng Bgy. Buyo sa naturang bayan.

Ayon sa ulat, kasama ni Gloria ang kanyang mister nang mangisda sila sa karagatan, pero dahil sa lakas ng alon ay tumaob ang sinasakyan nilang bangkang pangisda.

Nabatid na tinangka pa ng mister ni Gloria na saklolohan ito, pero agad lumubog sa dagat ang biktima at makalipas ang ilang oras ay walang malay itong lumutang.

Kaagad dinala ng kanyang mister ang biktima sa ospital, pero idineklara itong dead-on-arrival.