Agarang aksyon para sa mga biktima ng pag-aalburoto ng Mayon

by Info @Editorial | May 4, 2026

Muling nagbuga ng makapal na usok at abo ang Bulkang Mayon, at malinaw ang mensahe nito: hindi dapat mabagal ang pagtugon sa sakuna.

Sa ganitong sitwasyon, bawat minuto ay mahalaga. Ang ashfall ay delikado sa kalusugan at maaaring magdulot ng kaguluhan sa komunidad. Kaya dapat agad ang paglikas, mabilis ang distribusyon ng tulong, at handa ang mga evacuation center.

Kapag mabagal ang aksyon, buhay ang nalalagay sa panganib.

Hindi sapat ang simpleng babala. Kailangan ng konkretong kilos—maagang pagpapalikas, sapat na pagkain at gamot, at maayos na koordinasyon ng mga ahensya. 

Ang mabilis na pagsaklolo ang tunay na sukatan ng malasakit ng pamahalaan at mamamayan. Sa harap ng patuloy na pag-aalboroto ng Bulkang Mayon, ang pagiging maagap ay hindi opsyon—ito ay obligasyon.

Kaya sa mga opisyal na natutulog sa pansitan, magsigising na kayo at magtrabaho.

Panawagan din ang agarang paglalabas ng pondo. Huwag nang dagdagan ang hirap ng mga biktima.