8 sabungero, arestado sa tupada

@Balitang Probinsiya | September 27, 2023

PALAWAN -- Walong sabungero ang inaresto ng pulisya kamakalawa sa isang tupadahan sa Bgy. Oring-Oring, Brooke’s Point sa lalawigang ito.

Hindi na muna pinangalanan ng mga awtoridad ang mga suspek habang iniimbestigahan sila sa himpilan ng pulisya.

Ayon sa ulat, may nagbigay impormasyon sa mga awtoridad na may mga nagsasagawa ng ilegal na sabong sa naturang lugar kaya agad itong sinalakay ng mga operatiba at dito nadakip ang walong suspek, samantalang mabilis na nakatakas ang iba pang sabungero.

Nakakumpiska ang mga operatiba ng mga manok na panabong, cash at mga tari sa lugar na pinagdausan ng ilegal na sabong.

Nakapiit na ang mga suspek na nahaharap ngayon sa kasong illegal gambling, samantalang pinaghahanap pa ng pulisya ang ibang nakatakas na sabungero.