5 tulak, arestado sa drug den

@Balitang Probinsiya | June 2, 2023

ILOILO—Limang drug pusher ang nadakip sa isinagawang drug-bust operation ng mga awtoridad kamakalawa sa isang drug den sa Bgy. Poblacion Ilaya, Passi City sa lalawigang ito.

Ang mga suspek ay nakilalang sina Edmundo Bugna, Anthony Joco, Peigen Agustar, Mariette Villawala, pawang nasa hustong gulang, at isang menor-de-edad na itinago sa alyas na "Mike", pawang mga residente sa nasabing lalawigan.

Ayon sa ulat, may tinanggap na impormasyon ang mga awtoridad na ginagawang drug den ang isang bahay sa naturang barangay kaya agad itong sinalakay at dito nadakip ang mga drug pusher.

Nabatid na nakakumpiska ang mga awtoridad ng apat na pakete ng shabu at markadong pera sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa Dangerous Drug Act of 2002.