5 tulak arestado sa drug den

@Balitang Probinsiya | Pebrero 12, 2023

NUEVA ECIJA – Limang drug pusher ang nadakip sa isinagawang drug-bust operation ng mga awtoridad kamakalawa sa isang drug den sa Bgy. Daang-Sarile, Cabanatuan City sa lalawigang ito.

Itinago muna ng mga awtoridad ang mga suspek sa mga alyas na "Owe," "Tinoy," "Muning," "Angel" at "Nene," pawang nakatira sa nabanggit na lungsod.

Nabatid na may natanggap na impormasyon ang mga awtoridad na ginagawang drug den ang isang bahay sa naturang barangay kaya agad itong sinalakay at dito nadakip ang mga drug pusher.

Ayon sa ulat, nakakumpiska ang mga awtoridad ng 28 gramo ng shabu at markadong pera sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa Dangerous Drugs Act of 2002.