4 na bahay, nasunog

@Balitang Probinsiya | April 19, 2023

AKLAN—Apat na bahay ang tinupok ng apoy kamakalawa sa Bgy. Tabayon, Banga sa lalawigang ito.

Ang mga nasunog ay ang mga tahanan ng apat na magkakapitbahay sa nabanggit na barangay.

Ayon sa ulat, nakita na lamang ng mga residente na nag-umpisa ang sunog sa isang bahay at dahil sa mabilis na pagkalat ng apoy, nadamay na nasunog ang tatlo pang kabahayan sa naturang lugar.

Wala namang iniulat na nadisgrasya sa naganap na insidente.

Sa ngayon ay inaalam pa ng mga arson investigator ang sanhi ng sunog at halaga ng napinsala.