3 tulak nasakote sa drug den

@Balitang Probinsiya | March 22, 2023

ZAMBALES—Tatlong drug pusher ang nadakip sa isinagawang drug-bust operation ng mga awtoridad kamakalawa sa isang drug den sa Bgy. Del Pilar, Castillejos sa lalawigang ito.

Nakilala ang mga suspek na sina Albert Ferrales, Laurence Callo at Ronnie Crisostomo, pawang nasa hustong gulang at mga residente sa nasabing barangay.

Ayon sa ulat, may tinanggap na impormasyon ang mga awtoridad na ginagawang drug den ang isang bahay sa naturang barangay kaya agad itong sinalakay ng mga operatiba at dito nadakip ang mga drug pusher.

Nabatid na nakakumpiska ang mga awtoridad ng 20 gramo ng shabu at markadong pera sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa Dangerous Drugs Act of 2002.