3 katao, sugatan sa banggaan ng 2 motorsiklo

@Balitang Probinsiya | February 20, 2021

AKLAN—Tatlong katao ang sugatan nang aksidenteng magkabanggaan ang dalawang motorsiklo kamakalawa sa Bgy. Linabuan Sur, Banga.

Ang mga biktima ay ang mag-asawang sina Rowelo, 56-anyos at Luz Cordero, 52-anyos at si Krisian Verde, 24-anyos, pawang residente sa nasabing lalawigan.

Ayon sa ulat, mabilis umano ang takbo ng motorsiklong minamaneho ni Rowela habang kaangkas ang misis niyang si Luz at ang motorsiklong minamaneho ni Verde kaya aksidenteng nagkabanggaan ang dalawang sasakyan sa nasabing lugar.

Nabatid na sa lakas ng pagkakabangga ay nagtamo ng mga sugat sa ulo at katawan ang mga biktima.

Kaagad dinala ng mga saksi ang mga biktima sa ospital at kasalukuyan na silang ginagamot, samantalang iniimbestigahan na ng pulisya kung sino ang may pananagutan sa naganap na aksidente.