23 teroristang Abu Sayyaf sumuko

@Balitang Probinsiya | March 9, 2023

SULU – Dalawampu’t tatlong miyembro ng teroristang Abu Sayyaf Group (ASG) ang sumuko sa pamahalaan kamakalawa sa bayan ng Indanan sa lalawigang ito.

Para sa kanilang seguridad ay hindi na pinangalanan ng mga awtoridad ang mga sumukong terorista.

Nabatid na isinuko rin ng mga ASG sa mga awtoridad ang dala nilang mga armas at mga pampasabog.

Ayon sa mga sumurender na terorista, nais na nilang makapiling ang kanilang pamilya kaya nagpasya silang magbalik-loob sa gobyerno.

Isinasailalim sa taktikal na interogasyon ang mga sumukong ASG upang matiyak na bukal sa kanilang kalooban ang pagbabalik-loob sa pamahalaan.