2 kelot, tinodas ng 3 katoma

Cotabato City—Dalawang lalaki ang namatay nang barilin ng tatlong salarin na kanilang nakainuman sa tindahan kamakalawa sa Bgy. Kalanganan.

Nakilala ang mga biktimang nagtamo ng mga tama ng bala sa katawan na sina Marvin Ibañez at alyas Totong, kapwa caretaker sa palaisdaan sa nasabing barangay.

Ayon sa ulat, habang nag-iinuman sina Ibañez at “Totong” ay dumating ang tatlong hindi kilalang suspek at nakipagkaibigan sa kanila hanggang sa makainuman ng dalawang biktima ang tatlong salarin.

Nang magpaalam sina Ibañez at “Totong” na aalis na ay bigla silang pinagbabaril ng mga suspek.

Mabilis na tumakas ang mga suspek, samantalang inaalam na ng pulisya ang motibo ng mga suspek sa pamamaslang sa dalawang biktima.