Tips para manatiling hydrated ‘pag sobrang init

Bukod sa kasalukuyang nararanasan natin sa pandemic na unti-unti na ring nababawasan ang tindi ng epekto sa atin, sumasabay naman ang panibagong krisis sa kalusugan ang dala ng tag-init. Sa heat index na naitala sa nakalipas na araw ay talagang napakainit, na umaabot pa sa 50 degrees.

Kaya naman dapat ay mayroon tayong alternatibong paraan para hindi tayo ma-dehydrate.

Narito ang ilang tips para manatili tayong hydrated sa panahon ng summer:

Uminom ng maraming tubig. Dapat uminom ng maraming-maraming tubig upang ma-replenish agad ang anumang lalabas na tubig sa ating katawan. Kung kinakailangan, oras-oras ay gawin ang pag-inom ng tubig o kahit na anumang inumin tulad ng juice. Maaari ring kapag may inilabas na tubig sa katawan agad na uminom ng isang baso ng tubig. Iwasan ang uminom ng alcoholic drinks at may caffeine dahil mas magandang uminom ng sports drinks dahil may taglay itong sugar, nutrients at electrolytes na kailangan ng katawan.

Kumain ng pagkaing mataas ang water content. Mas mainam na tuwing kakain ay sasabayan natin ng mga pagkaing matutubig o mataas ang water content tulad ng watermelon o pakwan (92%), strawberries (91%), cucumber (95%), lettuce (96%), kamatis (94%), cabbage (92%), sabaw ng buko (95%) at marami pang iba. Malaki ang naitutulong nito na madagdagan ang tubig sa ating katawan para hindi tayo manghina.

Maging aware kung ilang beses pinapawisan. Magandang lumalabas ang pawis sa ating katawan dahil ito ay mga toxins na dapat maalis. Minsan, hindi natin namamalayang nasosobrahan tayo sa pag-eehersisyo. Sa ngayon, mas mainam na konting exercise lamang ang gawin dahil kung pinapawisan tayo nang sobra, masama ito sa ating kalusugan. Unti-unting nawawala ang tubig na kailangan ng katawan na dapat ay mayroong 60 porsiyentong tubig na naibibigay sa utak, puso, baga, kidney, skin, muscles at buto. Kung gaano tayo karami pagpawisan, dapat ay ma-replenish ito agad, kaya kinakailangang uminom ng maraming tubig.

I-check ang IHI. Ang kulay ng iyong urine o ihi ay indikasyon kung gaano karaming tubig ang kailangan at warning sign na maaaring dehydrated na. Dapat na pale yellow at clear ang ating urine. Kapag dark ang kulay nito, nade-dehydrate na ang isang tao. Ang pag-inom ng maraming tubig ay mainam na panlinis ng ating katawan. Maganda rin ang pag-inom ng sabaw ng buko o buko juice.

Maligo nang madalas. Kahit na hindi nakaka-hydrate ang pagligo, mas mainam naman ito dahil hindi tayo mabilis o agad papawisan. Magandang maligo nang medyo malamig na tubig dahil nare-refresh ang ating katawan at maiwasan ang mabilis na pagpapawis. Gawing dalawang beses sa isang araw na mag-shower o maligo.

Sa panahong hindi tayo nakakalabas ng bahay dahil patuloy pa rin ang community quarantine, ninanais nating maibsan ang sobrang init na nararamdaman na maaaring maging sanhi pa ng karamdaman. Tagaktak man ang pawis, may solusyon naman para hindi maubusan ng tubig ang katawan. Gawin natin ang ganitong paraan para hindi tayo mahirapan. Okie?