FDCP, MAGLALABAS NG GUIDELINES BAGO PAYAGANG MAKAPAG-TAPING AT SHOOTING ANG MGA ARTISTA

Erlinda Rapadas / Teka Nga

Maraming movie and TV workers ang gustung-gusto nang magbalik-trabaho matapos ang mahigit dalawang buwang quarantine at walang pinagkakakitaan.

Pero, hindi nga ito basta magagawa dahil may mga guidelines pa rin na ibibigay ang FDCP (Film Development Council of the Philippines) na ia-approve pa at magdaraan sa IATF (Inter Agency Task Force) at sa Department of Health.

Maging ang PMPA (Philippine Motion Pictures Association) ay magkakaroon ng partisipasyon at consultation sa iba't ibang guilds, television and advertising industries ng bansa. Mahaba-habang talakayan pa ang magaganap upang makabuo ng final guidelines.

Pero, paniniyak ni FDCP Chairperson Liza Diño, tutulong sila sa mga tapos nang pelikulang Tagalog at puwedeng sa online platform na ito mailalabas.

May partnership ang FDCP sa ilang international platforms. May meeting na sila sa Netflix at Iflix.

Magkakaroon ng sine lokal ang FDCP na gagawing online, ang Sine Local Online. Isa itong streaming platform na magkakaroon ng option to monetize their content. At puwede ring mag-host ng online film festivals.

Malaki ang malasakit ni Chair Liza Diño sa entertainment industry at umaasa siyang makakabangon muli kapag natapos na ang COVID pandemic crisis.