3 pulis, sibak sa liquor ban

Sinibak na sa kanilang posisyon ang tatlong pulis sa Western Visayas dahil sa umano'y paglabag sa liquor ban na mahigpit na ipinatutupad sa rehiyon.

Tinukoy ng Police Regional Office VI ang mga pulis na sina Police Staff Sergeant Roy Panaguiton ng Sebaste Municipal Police Station sa Pandan, Antique; Police Corporal Arnie Luminario ng Iloilo City Police Office; at Police Staff Sergeant Paul Pingoy na nakatalaga sa regional headquarters.

Ipinagharap na rin ng mga reklamong paglabag sa Article 151 ng Revised Penal Code at Republic Act No. 11332 (Mandatory Reporting of Notifiable Diseases and Health Events of Public Health Concern Act) gayundin ng Republic Act No. 11469 (Bayanihan to Heal as One Act) ang mga naturang pulis.

Ayon pa sa PRO VI, maliban sa criminal complaints ay mahaharap din sa administrative charges ang mga nasabing tauhan ng Philippine National Police (PNP).

Dinakip ang tatlong pulis sa quarantine control points sa magkakahiwalay na insidente habang tinatangka umanong ipuslit ang alak sa gitna ng enhanced community quarantine.