Insidente ng cybercrime sa gitna ng ECQ, umakyat ng 100%

Sa mahigit isang buwang pagpapatupad ng enhanced community quarantine, batid nating hindi lamang kabataan ang madalas babad ngayon sa internet kundi maging ang mga empleyado na sakop ng work-from-home, gayundin, ang ilang negosyo na internet ang kinakapitan para makapagpatuloy sa kanilang operasyon.

Kaugnay nito ay inihayag ni National Bureau of Investigation (NBI) – Cybercrime Division chief Victor Lorenzo, na tumaas ng 100% ang naitatalang cybercrime incidents sa buong bansa.

Aniya, numero-uno sa kanilang mga nakukuhang reklamo ay phishing kung saan nagpapanggap ang mga cybercriminals bilang mga financial institutions at hinihingan nila ng personal na pagkakakilanlan o personal information ang mga tao online.

Maliban sa phishing, ang paggamit o pag-access sa mga kahina-hinalang websites ang ikalawang pinakakaraniwang cybercrime ngayong may ECQ.

Payo nito sa mga biktima na i-report ang mga ganitong insidente sa Philippine National Police (PNP) at sa NBI para sa kaukulang dokumentasyon.

Ang pagnanakaw ng mga personal identity o anumang modus sa internet ay matagal ng perhuwisyo, ngunit dahil mas maraming gumagamit nito sa panahon ngayon, hindi nakapagtatakang mas naglipana rin ang mga mapagsamantala.

Kaya mag-ingat at maging responsableng internet user, ‘wag magpabiktima.